.…de Valentinsdaach awwer aach! Wemmer e’mol so lang ve’heirat is, wi ich’s wa, dann kammer mitredde. Si kimmt, si geht…di Liib! Heit himmelhoch jauchzent, moije zu Tode betriibt. Ni hot merr bei de Liib di Garandi, dass’se eewich bleibt, also so lang, bis eener odder de anner vun dem „glücklichen Paar“ schderbt. Viil effdersch kimmt’s vor, dass merr sich in seim Gefihlt, e’annere Mensch geere ze honn, geerrt hot. Dann is merr dootunglicklich, ve’leicht awwer aach erleest, wemmer e’Krambe am Hals hengke hatt odder merr hot’s devor schunn druff aangeleet, weil di „Liebe“ nor e‘Abenteuer sein sollt, dass merr halt iwwerschdehn muss. Jetz kimmt jo no de eerscht Hitz, di zwett, ve’leicht di dritt noch, bei de verrt bin ich merr nit so sicher, do hot merrs Pulver mehrschdens schunn ve’schoss, „…aber di Liiiibe bleibt!“ wi’s in de uffmunternde Liider heeßt. Dorchhalle, das is dann di Parole! Un wenn de schunn alt bisch, do gibt‘s oft gakee ze’rick mehr! Doch findich wi di Menschheit is, es werrd ebbes erfunn was di Liib babbe duut. Kee Uhu, kee Gummiarabikum, aach kee Zweekombonende-Kleber kann di kabutt Liib widder kitte, di in de lange odder korze Johre „in die Brüche“ gang is. Mir Deitsche honn di greescht Kanon erfunn, di unendliche Brezel, di eerscht Uhr, de Buchdruck un weeß de Deiwel was noch alles, doch di Ameriganer honn e’“Kitt for di Liebe“ erfunn, mir deede Mehlbabb driwwer saan. Dodemit wär di „Liebe“ länger zu erhalle, meene’se di Ami! Awwer nit nor das, de Rewach mit dem Zauberwort „Valentinstag“, wo merr „der Liebsten“ Blummer odder annere Schmus schengke soll, mache hauptsächlich di Blummehänneler im Land. Je mehr di Liib mit Blumme bedacht werrd, je lauder rabbelt bei dene es Geld im Kaschde. Doch dengkt draan, es is wi beim Mudderdaach: „Der is nit nor eemol im Johr, den gibt’s alles Daach!“ saat merr mei Mudder schunn.
1 Kommentar
|
AutorKarl Rudolf Hornberger alias „de Hombes“ ist ein Fotograf und Mundartdichter aus Bad Kreuznach im Tal der Nahe am nördlichen Rand des Nordpfälzer Berglandes. Seine Mundartglosse "Em Hombes in die Fiiss gelaaf erscheint regelmäßig im "Oeffentlichen Anzeiger". Kategorien
|