… uff de een Seit am Backe vorbei, noch zwee Kissjer uff di anner Seit un wemmer in Frankreich sinn, misses drei Kissjer sein „ zur Gunstbezeugung“. Das alles langt awwer noch nit mit dere „Kisserei“ . Es gibt di „Liebesbezeugung“ schunn im Kindsbett. Wemmer di Aa uff schleet, kimmt di eerscht Berihrung vun de Mudder, wenn di ihr Mailche schbitzt un si drickt ihrm Wonnebrocke de eerschde Kuss uff sei kleen Keppche odder uffs Ärschje, weil das aach rund is. „Das is vun mir! Du bisch mein!“ denkt di jung Mudder. Di Gunstbezeugung is mit nix besser auszudrigge als wi middeme Kuss - un so soll‘s aach bleiwe. –
Jetz gibt’s awwer aach Famillje di iwwertreiwe di Liib. Knutschele das Kind un iwwerschittes mit Kissjer, was das Kind ganit will. Annere Leit, Mudder, Vadder, Oma, un Oba mit ingeschloss, di mache sich oft nit viil aus dere Kisserei, ei di lache nit e’mol mit dem Kind! Doch das is aach ve’kehert, denn di „Lieb“ muss jo aach gelernt werre un wi annerscht soll merr sei Zuneichung zeiche, als wi middeme Kissje, zart un nit so wild. Merr muss’es iiwe, was de Madam, em Schorschkaal odder wi di „Lust der Begiirde“ aach heest. Minne und Mai is dann di Zeit wo for fasch alle Mensche es Kisse interessant, ja sogar notwennich werrd um Wirkung zu erzeiche. Oft lässt’se mit de Johre no, di Kisserei, doch bei viile Mensche hält di Gunstbezeugung es Leewe lang aan, un so kimmt’s, dass merr als „alder Bock“ odder als „verschrumbeld Scheenheit“ hi un do e’Kissje als Gunstbezeuchung kriid: „Gell, ich honn Dich doch so aarich geere!“ heeßt das Liid ohne Worte: De Kuss uff de Plattkopp odder in schüttere Haar bürgelt alles widder glatt.
0 Kommentare
„Wo ein Wille ist, ist auch ein Weg!“ so heeßt’s im’me alde deitsche Schbrichwort, doch wo heert merr di heit noch? Mir hot merr mei Mudder ingebläut un do honn ich mich mei leewelang aach draan erinnert un draan gehall. Wenn’s eem gut geht, dann kann merr das Schbrichelche ve’gesse, doch es komme Daache, do schdeht merr middem Hinnere aan de Wand – un merr meent: Jetz geht nix mehr! „Peifedeckel, Herr Parre ! Ich will, dass es weiter geht, dass ich di Situation packe! Es muss iwwerschdann werre!“ Das sinn di Dialoche di ich mit merr selbscht fihre, wenn’s in merr „eng“ werrd. Das fängt bei Kleenichkeide schunn aan un wenn di große Lebensuffgabe komme, un di komme!, Krankheede, soziale Schiiflaache, wenn’s eem innewennich nit gut geht, dann eerscht recht! Henge un bambele losse gibt’s nit! Do werr ich mit merr selbscht „per Du“ un gewwe meim innere Schweinehund Leine, gewwe also Gordel no, wi mir Kreiznacher uns ausdrigge. Kämpfernadure honn do e’Vordeel geeje iwwer Lahmärsch, das is leider so. Karakderziich sinn eem vun Nadur aus mitgebb , das is leider so. Doch aach dene „minderbegabte“ im Lebenskampf muss ich saan: „Nit uffgewwe! Ich will, un ich kann! Es gibt immer e’Weech der eem aus de „Bredouille“ fihrt!
Di alde Schbrich un Siegesrufe sinn Gott sei dank vorbei, nor di Kaiser Wilhelm Schtrooß erinnert di Leit noch jeden Daach aan di nixnutzichr Briider, di weeche „Kleenichkeide“ e’Weltkriich aangezettelt hadde, wo millione Soldade, oft junge Buwe ihr Leewe losse mussde. Mit Blummeschtreißjer am Karabiner sinn’se in de Zuch geschdii un gen Westen aan di Front, in de Schitzegrawe geschickt worr. De Marschbefehl wa: „Rekruten, Ihr habt noch 6 Wochen zu leben! Kämpft!“ Unnerm Owwerbefehl vumm Kaiser Wilhelm II (merr muss’se ausenanner halle!) honn zich Generäl zum „Angriff geblasen“. De Owwerscht, de Kaiser is deno, als de Kriich ve’lor wa, no Spa in Holland geflicht un hot dort gelebt wi „Gott in Frankreich“. Mit silwerne un goldene Leffel hodder mit samt seiner Fraa gess. Er war e‘Antisemit un e‘ Sympathisant vumm Hitler! Perseenlich deet ich saan, un dere Meenung bin ich nit alleen: „Vun dem seim Wisse un Könne her, wär der nit im Schdand gewees e’Dönerbud zu fihre!“ Kreiznach hot e’Schtrooß no’m benennt! Jetz, wo de Schdadtrat am „ausbiile“ vun Schtrooßename is, wär’s aan de Zeit aach di Kaiser Wilhelm Strooß umzubenenne, odder? Wer di Grausamkeide vumm „Ersten Weltkrieg“ sich aangugge will un das aach kann!, der soll sich jetz den Oskar-Präamierte Film im “ Westen nichts Neues“ aangugge. Er werrd merr recht gewwe.- |
AutorKarl Rudolf Hornberger alias „de Hombes“ ist ein Fotograf und Mundartdichter aus Bad Kreuznach im Tal der Nahe am nördlichen Rand des Nordpfälzer Berglandes. Seine Mundartglosse "Em Hombes in die Fiiss gelaaf erscheint regelmäßig im "Oeffentlichen Anzeiger". Kategorien
|