![]() Merr werrd jo im Alder seltsam, das is so un keener bleibt ve’schont. Dinger, wo merr frihjer ganit gemerkt hot, dass’es di gibt, di merkt merr heit. Oft sinns Kleenichkeide di merr ni wahrgenomm hot, doch di gehn eem heit aans Herz. Das is so un es freit eem, wo di Freid sich awei immer rahrer macht. Wenn ich mit meim Modorreddche so doch di Gechend brumme, fihrt mich mei Weech oft uff de „Sonnehof“ in Aldebamberch. Dort hot e’Freind vummer e’Praxis for’s kranke Vihzeich. Dann hock ich mich vor’s Haus un zehle di Wolge odder gugge uff di Aldebaumburch, wi scheen’se hoch owwe im Wald leit. Ich hogge noch kee fünnef Minudde, dann kimmt e’kleen Kätzje un schtreich um mei Been. Es is immer di selb Katz, schwarz mit eener weiß Poot un si is di Mudder vun alles Katze di uffem Hof e’rumm laafe. Jettche werrd’se geruf, doch si kimmt nit immer, nor bei mich un di Vanesse, di Fraa vumm Hof. Si streicht um mei Been, hupst merr deno uff di Kni un hängt sich mit de Poode aan meim Pullower fescht. Deno leet‘se de Kopp aan mei Hals un schnurrt, dass‘er de Seewer aus’em Maul leeft. Dodebei werrd‘s vumm geschtreichelt, was das Kätzje scheint’s aarich geere hot. Un so lang ich do sitze, geht’s Jettche nit vun meiner Seit. Scheint’s merkt’s, dass ich Kätzjer geere honn. Hauptsach is for’s Jettche, wi aach for mich, dass eener no eem guckt. Wemmer alt is, kimmt das immer seltener vor – nit nor bei alde Katze, bei alde Mensche is das aach so.
0 Kommentare
|
AutorKarl Rudolf Hornberger alias „de Hombes“ ist ein Fotograf und Mundartdichter aus Bad Kreuznach im Tal der Nahe am nördlichen Rand des Nordpfälzer Berglandes. Seine Mundartglosse "Em Hombes in die Fiiss gelaaf erscheint regelmäßig im "Oeffentlichen Anzeiger". Kategorien
|