„Ei Willi, bische uff de Hund komm?“ „ Nee, nee, nee ich muss das Diiirche blooß pisse fihre. Der Hund, Boris heeßt’er weil de Becker domols ins Kittche kam un weil mei Fraa, di Elwira e’Fan vumm Becker is, hot‘se das Diirche Boris genennt. Er is rasserein, das musche wisse, wenn de de Preis heerscht, was der Hund koscht hot. Iwwer zweedausend Euro, ohne de Diirdockder, der kimmt noch owwedruff!“ „ Ei Willi, do kriiche jo bald e‘gebraucht Audo defor!“ „ Macht nix, was di Elwira honn will, un was di im Kopp hot, das kriid di aach. Ve’loss dich druff! Gugge moo, wi treu der guckt! Wi der di Fiißjer schdellt, als hätt ich’sem vorgemacht. Un wi der sei scheen Schwänzje trächt, guck genau hiin! Es is zwaa nor e’Schdummelschwänzje, awwer er zeicht was’er hot!“
„Ja Willi, do hot Dei Fraa e’gude un deijere Kauf gemacht un aach de Name vun dem Diirche is bassend. Dengk immer draan, wi schnell es Leewe geleebt is un e’bissje Freid soll de Mensch jo honn.“ „Di Elwira seet, er wär so e’richdiche Muslabbes un si hädden so aarich geere, mit mir wär jo nix mehr aanzefange. Was merr sich alles saan losse muss. “ „Willi, dengk immer dran: So e’Hund hot jo aach nor e’korz Lebenserwartung. Do kann der gut schmuße. Du bisch 40 Johr mit Deiner Elwira ve‘heirat, do lässt di Schmusaerei langsam no.“ „Hombes, soweit honn ich noch ganit gedacht: „Komm Boris, merr misse noch Pingkele gehen!“
0 Kommentare
|
AutorKarl Rudolf Hornberger alias „de Hombes“ ist ein Fotograf und Mundartdichter aus Bad Kreuznach im Tal der Nahe am nördlichen Rand des Nordpfälzer Berglandes. Seine Mundartglosse "Em Hombes in die Fiiss gelaaf erscheint regelmäßig im "Oeffentlichen Anzeiger". Kategorien
|